遊艇老友交流站

歡迎閣下在此分享任何與遊艇活動有關的項目,包括考試技巧、駕駛經驗、機件維修、購物情報及最佳景點等資料。所有討論文章及相片必須與遊艇活動有關,而且禁止含有不雅、誹謗、誤導及商業推銷成份。所有言論內容,本會絕不負責,並且有權隨時刪除而不作任何通知。

如需刊登私人買賣租賃廣告,煩請使用免費買賣/租賃專區
亦歡迎電郵本會 info@hkyacht.com.hk 查詢交換買賣廣告專頁費用

遊艇老友交流
Start a New Topic 
Author
Comment
部船尾機唔識放下

小弟有些問題想請教下各位師兄...

小弟2個月前買了一隻二手艇,23呎長配150PS EVINRUDE船尾機(1996年機),好開心第一次做船主,一嘗海上暢遊樂趣。

我每星期均有出船,雖然部機年紀大,但係上手都KEEP得不錯,好精神,轉數定,升降著車沒有問題。

但是昨天想出海時,發覺部機不能電動放下(按掣是有電到,油壓PUMP聲音正常,但部機動也不動),唧了潤滑油在較位,再用力按實部機再按掣亦如是,請問各位有什麼睇法? 另外我想找一個大偈幫我CHECK車清下個化油器換火咀,請問以我部機來說一般要多少$? 請各位師兄賜教,謝謝!

Re: 部船尾機唔識放下

車仔
早排我隻24呎艇都出現同樣問題,比較你嚴重.
1.升降積桶漏油,我都要用鐵筆才可將船尾機升起,(好彩有船友幫手)然後整體拆離,打散後更換內部油封密膠圈,費用85元裝回後.上落多幾次排清積桶內氣鎖.
2.無幾耐又出現唔行,檢查油泵無聲發出,於是檢查電器,原來負責升降電源繼電電器失靈,去買啦無貨,於是拆開RELAY仔睇睇原來內部接觸不良用沙紙及清潔水清完再裝回,蝦蝦正常.
3.用咗二次第二副車又唔識上落,情況好似你出現咁,打開個油壺睇睇,如彩原來唔夠壓力油,加咗後用到依家.
你副車仔應該係,壓力油不足,嘗試用力將船尾機升起,設在升降積桶旁有一個油壺甭,旋開個塞加壓力專用油至平滿,再試機是否可以下降.
換火嘴並不困難,試吓自己換,拆出火嘴後睇吓火嘴尾巴顏色可以知道汽缸燃燒情況,未必需要調校風油混合比,觀察火嘴假如呈灰色風多,黑色油多,棕色代表正常,由於你副是二衝程機,特別觀察黑色時及有些微油積用布抹抹佢,後再睇顏色.
隻船是自已的,可以嘗試去保養吓佢,多啲了解吸收多些經驗,對日後出航時出現問題唔使攪到自已企道唔知點算,這是我提議並不是代表甚麼.
如果你試完講來聽聽效果怎麼辦.

Re: 部船尾機唔識放下

mkc兄,

多謝你既指導同分享,我會試下睇睇後再匯報!thanks!

我而家都在網上訂購緊Evinrude repair manual, 連shipping約HK$400, 睇下可否日後DIY做保養維修,除了可以慳錢外,最重要知道部車一些問題徵狀,及早處理防患未然,否則夏季來臨一家人以為可以滿心歡喜去遊船河,倒頭來掃興而返就唔好了。

還有想請教師兄一下,要清洗化油器是否很困難? 日常保養要做些什麼?

Re: 部船尾機唔識放下

我而家都是用緊同品牌型號馬力船尾機,日後可否借用參考數據.
因為現時只靠經驗去測車.
洗化油器,並不十分困難,主要清洗風油噴嘴,浮波子及可控閥(即星型閥).
比較難是調校燃油與進風閥,在低轉速時之混合比,可直接影響機車在低轉運行時不穩定,燃燒不完全等,引起火嘴,汽缸,生死氣閥門會造成積碳導致漏氣,減低功率.
本人如發覺懷疑化油器噴油不正常,會嘗試到汽車零件售賣店,購買洗化油器噴劑,打開化油器吸風蓋,稍為加大油門後噴射清洗劑,待化油器吸入後,停車一段時間後,再重新起動並以迨速(慢速)運行待清洗劑燃燒乾淨後,再正常試航.
例行保養,經常旋開儲油池(化油器底油杯)排放沉積物,水份等,定期檢查更換吸風隔沙,檢油供應過濾器隔沙及排放過濾器底油杯水份,假如長時間停用,關閉來油供應,並排放油杯存油.盡量避免海水或潮濕空氣入侵.

Re: 部船尾機唔識放下

我都試過架機放不下,首先看fuse,唔係fuse簡單就是換上升的relay試下,換完如果下降OK,上升唔得就是 relay ( 用多年就壞都是正常的),如果你有維修手冊,知道是那兩條電線,只需掉換兩條電線試架機上升或下降。唔會煩。如果壞relay,拆出來買零件就OK喇。

如果你要洗化油器,如不是積死,現場一般四五百銀就OK,要大拆回廠攪就千零銀,你攪得化油器,換火咀人工唔會再計你的,當然火咀成本另計。

Re: 部船尾機唔識放下

你部機起落油泵應該漏油,平時留意海面有冇油鏡出現,可能漏得好慢,加返油睇下用得幾長時間,維修手冊我有,40匹至225都有,歡迎借用,大家研究下,150匹起運來V6化油器放水係則邊,最好拆左供油油喉,等部車將化油器內既油行清至放,小心唔好食煙,好舊既機至有得調節風油位,新的既機係冇得調節。

Re: 部船尾機唔識放下

多謝各位師兄回應!

德明兄,請問可以借manual一用? 我知道manual中有好多圖片可以依樣畫葫蘆般跟住做...但我趕不及復活節假期前收到manual自己動手做,沒有manaul我沒有把握自己可否做得到....起碼今次如果要請師傅做的話都知佢做左d什麼同埋可以了解多d。

而家我自己都在動手油船底防蠔殼油,船廠報價收我$1,500,我在新填地街油漆批發自己訂了一桶4升防蠔殼油都只不過$250,反正都租了岸上位,可以自己動手做,享受當中過程,而且始終自己做可以細心d^^

還有,我想請問下各位部船尾機會不會好似一般汽車engine一樣有"正時皮帶"(cam帶 要更換?定還是用cam鏈可以永久使用?

Re: 部船尾機唔識放下

車仔, 想請問下係咪一罐一公升呢? 你用開邊隻牌子, 質素如何?

Re: 部船尾機唔識放下

JOEY,

我問的批發沒有一升裝....我買了4升一桶(好似我們平時屋企用的乳膠漆包裝),駱駝漆,名字叫"木船船身防蠔油漆",我問批發有無d係俾玻璃纖維用,佢第2日回覆我話問過廠防蠔殼油只得一種,仲可以選擇顏色,我落訂第3日就有貨。 佢建議我先做一層底漆先,否則玻璃纖維滑面可能唔上油,因為我隻船上手有油過,只係有部份甩油,所以我都只是用沙紙執一執同洗下d青台處理就算。

我仲未開工油,但會今個星期完成佢,完成後再匯報大家。

Re: 部船尾機唔識放下

唔明,看唔明,明明講船尾機,點解講左油漆?

如果船尾機無油壓油,根本落唔到,上唔到,但發問者又講左去油漆............

Re: 部船尾機唔識放下

唉,講錯添,無油壓油,架船尾機只會落,落完無得升添,所以上文MKC 或我講左,落唔到船尾機可能是 relay 的事。
但講講下,變左講油漆~~~~~
至於你問 cam 帶? 你會唔會問問下變左問姨媽帶?

Re: 部船尾機唔識放下

又嚟?

Re: 部船尾機唔識放下

車仔:
我已e左電話號碼比你,你買既船底油太多喇!我隻21尺都係用一公升就得喇!船底油油左之後24小時內要落棑,否則的油會失效,船底油開左之後最好用埋佢,唔可以加天拿水,重有四衝程既機至有cam,兩衝程機係冇既!

Re: 部船尾機唔識放下

Hong兄:何必太認真,在這裡應可天南地北嗎!又不是在法庭或軍校,只得 YES OR NO . 吹吹水又一日,何樂也!

Re: 部船尾機唔識放下

師兄們,

得各位釋心指導,獲益良多....不好意思,初到此地,不識規矩,懇請見諒! 明白Hong兄想討論內容與標題相符,方便查閱討論以豐富內容,否則討論區內容失控...小弟明白贊同,日後必會多加留意。

昨晚依各師兄建議,我檢查了各部份,包括油壓,電器contact,都沒有發現問題...就在檢查過程中,我嘗試按掣,部機無啦啦正常番,試過上上落落10多次,均運作正常,吹脹!! 個心15/16,唔知叫唔叫師傅check機好,擔心日後出去玩會上左落唔到,之後船廠看船阿叔同我講,部機左側其實有口鏍絲,如果部機上左落唔到可以慢慢鬆一鬆,好似車用油壓唧咁放油,部機自然會放落黎。 聽完都放心了,anyway,多謝各位幫忙!

Re: 部船尾機唔識放下

德明兄,你提到油完要24小時內落水,我幾次都隔成幾日(因吾得閑),通常三个月後啲油會由紅色轉綠色和開始生蠔叔,你認為有冇關係呢?

Re: 部船尾機唔識放下

抱歉: 飲多兩杯,自己都唔知up乜,謹此致歉。

Re: 部船尾機唔識放下

Hong 生,你第幾次飲多兩杯o係道亂吹呀???

不過話時話,你都幾好野吖,飲貓咗都仲可以打到咁多字,失敬失敬...

Re: 部船尾機唔識放下

做人講過做過的野,我唔會唔認,我講過就是我。
道歉我已經有,希望各位兄弟包容。
飲多時,根本唔應該開車或玩電腦。

謝甚

我都想知係邊到買船底油呀 可比個電話no 同地址我嗎 ?

我都想知係邊到買船底油呀 可比個電話no 同地址我嗎 ?

Re: 我都想知係邊到買船底油呀 可比個電話no 同地址我嗎 ?

港島南去鴨脷州大街

Re: 我都想知係邊到買船底油呀 可比個電話no 同地址我嗎 ?

西貢 利記tel 2792 3045 德隆後街21號